不經不覺，Joyce肚內的ＢＢ已有五個月大，屬於唱家班的Joyce實行親自唱歌作胎教，她笑說：「我震晒音唱歌，我諗ＢＢ會容易啲認得我把聲。」Joyce一向熱愛音樂，她揚言生Ｂ後會繼續教唱歌。她亦為肚內的ＢＢ寫了首英文歌，她透露：「都想出一張ＢＢ album，寫媽咪與小朋友之間嘅歌。」

唔去高級餐廳

自從大肚後，Joyce的口味變得怪怪的，每次到高級餐廳跟老公撐枱腳，她總是作悶作嘔，她表示：「依家enjoy唔到法國餐、意大利餐，試過幾次都係咁，好慘。依家最鍾意去茶餐廳同麥當勞，可能個Ｂ鍾意食漢堡包。」她又笑言可幫老公慳唔少錢。

湊「仔」返放工

愛自由愛旅遊的Joyce，有ＢＢ後都驚被「縛住」，她說：「有ＢＢ多少係負擔，不過係另一種開心。」Joyce更自爆有產前抑鬱：「可能係賀爾蒙影響，有時會無端端喊、發脾氣、冇乜心情咁，不過依家冇嘢，老公都會喺側邊支持我。」

雖然腹大便便，但Joyce仍相約一班女友人到泰國旅遊，稍後又會跟老公飛去日本慶祝結婚一周年紀念，她甜絲絲笑說：「依家我朝朝開車送老公返工、放工，好似媽咪湊仔返學放學咁。」

文：音樂組 場地：通利琴行