曾經自爆被model公司老闆邀約到酒店上房而人氣急升的模特兒姜紫藍（Color），趁着暑假檔期再下一城，推出性感泳衣寫真集兼大爆娛樂圈秘聞，實行賣大包滿足讀者的八卦心態，以此對撼一眾靚模！
Color選址在台灣墾丁拍攝性感泳衣寫真集，並以多個不同的造型示人，包括古典民族、印度公主及日本少女等，並希望趕在今年動漫節推出。怕與同樣推出寫真集的靚模比較嗎？她說：「我哋都唔同類型，我本書仲會加插好多娛樂圈秘史，全部都係我自己親身經歷，因為好多讀者都鍾意睇八卦嘢嘛！」
深情專訪扮喊
至於會否開名？她續說：「我唔會講人哋啲嘢，只會講自己喺娛樂圈遇到嘅事，例如有啲人拍啲深情專訪會講到喊，其實好多都係假喊，因為我自己都試過畀導演要我諗啲唔開心嘅嘢，要諗到喊，但之後又畀另一個導演話我博出位。」她又謂試過在電視台工作，被迫扮主播的粉絲為對方谷人氣，拍旅遊特輯時又被導演欺負，要她做「茶煲阿四」煮早餐，總之騎呢事數之不盡！
一手一腳策劃
Color表示這本寫真集全是自己一手一腳策劃的，由取景、服裝到形象，她說：「今次拍攝過程都好辛苦，出發前自己已經發緊燒，去到當地天氣不穩，又吹風淋雨，搞到有尿道炎添！」有血有汗又有波，相信Color這本寫真集應該有不少回響！
文：名人組