于占元雖然面對數十甚至上百名弟子，但他仍堅持依照每位徒弟的個性與潛質，以「于占元」中的「元」字來起名。多年之後，原名夏令震的元彪、原名容繼志的元華、原名張轉男的元秋，仍然堅持使用于占元命賜的名字，可見他們對師傅的尊重，亦可反映出于師傅當年為徒弟起名時，那份費盡心思的自我要求。

一絲不苟‧必也正名

曾經在張國榮、梅艷芳主演的《胭脂扣》中，演出京劇選段的元菊說：「當年師傅為我哋起名真係好有心機，佢會喺京劇入面啲老倌同伶人身上搵靈感，譬如張派代表人物名旦張君秋，師傅就用咗佢個『秋』字嚟為三師姐起名。不過，師傅都有靈感用完嘅時候，去到後期啲師弟、師妹，師傅起名已經冇咁講究，甚至係信手拈來，東南西北中發白，梅蘭菊竹春夏秋冬都有出現過。」

就連向來喜歡在內心挑戰師傅權威的元華，也不忘插嘴：「係呀，點只東南西北中發白呀，直頭連元寶蠟燭香都出齊添呀！」

據元秋憶述，在于占元仍然相當講究為徒弟起名的那段日子，當發現有不貼切的，更不惜一改再改，自我推翻，可算是孔子「必也正名」的嚴格執行者。元秋說：「我原本唔叫『元秋』，起初師傅幫我起咗個名叫『元蓉』，後來發現我冇師妹把聲咁靚，『蓉』字啱師妹啲，於是將我『元蓉』個名同師妹調換，從此我就叫元秋，師妹就叫元蓉，好彩『元蓉』個名我都係叫咗兩日啫，師傅話轉咪轉囉，我一啲都冇覺得唔慣。」

知人善用‧有錯即改

于師傅在校內雖高高在上，卻非一意孤行，有錯即改，給徒弟樹立榜樣。事實上于師傅見微知著，最會發掘徒弟的潛能，難怪元秋大讚：「我覺得師傅唔只起名叻，仲好識根據每個人嘅唔同特質專長嚟分配應該學乜嘢，好似我把聲尖尖哋，又對動作有興趣，師傅就叫我學要打嘅武旦、武生，二師姐元甫把聲似老牛，師傅就叫佢去學老生、老旦，師傅睇人好少睇錯。」（四）