「2009香港小姐競選」將於八月二十二日假紅館隆重舉行，昨日十位候選佳麗在將軍澳電視城以花生騷形式首度正式與傳媒見面。今年佳麗雖然質素被彈，但勝在學歷高，據資料顯示，全部佳麗均達到大學程度，但亦因學歷高，有半數人達廿四、廿五歲，總算及時趕上選美「尾班車」。

「是非空姐」曾曦寧昨日回應負面新聞時態度囂張，一概否認。	一眾佳麗行「貓步」時表現緊張，希望到正式比賽時有改善。	「波神」Mandy笑容可掬，表現淡定。
「逼爆徐淑敏」鄭寶源收起身材難搶「峰」頭。	「女版許愿」林潔瑜改變形象後，樣貌依然「出眾」。

catwalk緊張似步操

眾候選佳麗經過大會連日來「改頭換面」，先以運動裝出場展示青春活力，接着再換上時尚服服飾，穿上短褲配以五吋高踭鞋大騷修長美腿，成功將焦點分散到美腿上。但大部分佳麗行catwalk時表現緊張，(2)「女版許愿」林潔瑜猶如步操，(6)黃嘉麗則好像在天橋上跑步。

「是非空姐」(1)曾曦寧（Hilaire）最近被本報讀者爆料，指她任職空姐時工作態度差兼懶散，又經常「屈」機師男友買名牌。前日一身名牌到髮型屋「變髮」的她，已預告會在記者會「解畫」。

Hilaire昨日接受訪問時，問到對是非有甚麼回應？她語帶囂張說：「咁你哋有咩問呀﹖（讀者爆料話你工作態度差！）熟悉我嘅朋友都知我唔係咁嘅人。（爆料嘅係你空姐同事喎！）我唔識嗰個人喎。（唔止一個人爆料，係咪同同事關係好差？）報紙講係得一個人，同同事關係OK呀。」Hilaire表示，現時正如報道所說正在放無薪假，並強調公司十分支持她參加選美。

多次亮相均周身名牌的Hilaire，問到是否很貪愛名牌？她說：「靚係女仔都鍾意，唔係話名唔名牌嘅。名牌多數係自己買嘅，男友都係送小禮物。（男友送嘅最貴禮物係咩？）錫我囉！對我好囉！專一就係最貴嘅禮物。（用錢買最貴嘅禮物係咩？）唔好用錢嚟定義啦！對我好就得，送過花囉！」

港姐昨日大晒冷，（1）至（10）佳麗（左至右）大騷美腿。

放大圖片

(9)袁嘉敏獲君如撐

另外，昨日亦有讀者報料，指(9)袁嘉敏（Candy）是由吳君如提名。袁嘉敏昨日承認此事，她表示之前為陳可辛擔任電影發行，君如覺得她有潛質，故提名她參選。君如接受電話訪問時透露，Candy已為陳可辛當了兩、三年秘書，君如說：「佢工作能力極佳，早前到康城買片，人又成熟，應對又好，樣靚身材正，有齊做港姐嘅條件。」

至於「瘦版廖碧兒」(4)劉倩婷原來一直在英國工作，三個月前因父親癌病離世，要返港照顧家人，並稱父親生前也支持她參選港姐。

文：影視組　攝：鄭家俊