英皇為歡迎古巨基加盟，舉行巡迴記者會盛大慶祝，除於周日在北京搞簽約儀式外，昨晚移師澳門舉行「古巨基登基加盟英皇娛樂盛典」，英皇群星撐場祝賀，包括：容祖兒、鍾欣桐（阿嬌）、鄭希怡、泳兒、陳偉霆、吳浩康、鍾舒漫、洪卓立、關智斌、李逸朗、扈佳榮、詩雅、湯怡等，賭王何鴻燊與四太梁安琪亦出席，場面盛大。

基仔在老闆楊受成（右）和吳雨陪同下，到澳門出席加盟儀式。

何鴻燊與四太梁安琪專誠出席撐楊受成。

詩雅湯怡化身空姐

昨午三點半，基仔與老闆楊受成、行政總裁吳雨由赤鱲角機場出發，乘搭楊受成的私人飛機去澳門，雖然只有短短10分鐘航程，但首次搭私人飛機的基仔，深深體會架勢翱翔的滋味，他笑說：「好開心，私人飛機好似自己屋企咁，有梳化、電視，真係超級享受。」英皇還派出詩雅和湯怡扮空姐，陳家樂和扈佳榮則扮機師，在澳門機場迎接基仔駕臨。

搞爛gag英俊買手信

雖然容祖兒、阿嬌都會出席澳門記者會，但只有基仔獲厚待坐私人飛機，可見基仔地位高人一等，身為「爛gag王」的他還發揮小宇宙本色，即時創作爛gag：「坐私人飛機好興奮，跟住落嚟我都要玩押韻：睇吓我哋幾英俊，嚟到澳門要買手信。」令大家笑破肚皮。

問到加盟英皇的心情？基仔興奮說：「公司好錫我，幫我搞巡迴記者會，除咗金錢之外，仲花費人力、物力同心血，我會努力工作回報公司，多謝公司總動員支持，令我好感動。」

文：音樂組