雖然「豬流感」致命率不高，但Ella跟新城《娛樂旗艦店》主持路芙、瑪姬、科林都未敢鬆懈，Ella說：「之前喉嚨痛我都好驚，都會諗有乜事點算？」為防感染，Ella會減少跟人握手，她說：「手係最多菌，依家都唔會用手掂塊面，每日返到屋企即刻除鞋、換晒啲衫，洗乾淨手先心安理得。」

電台空氣唔流通

新城方面亦相當重視防疫，早就為員工提供消毒藥水、口罩及咪套等必需品，路芙說：「公司已經講咗，萬一有員工確診，黃埔呢度直播室會關閉一至兩日清潔，大家要過去中環中心做節目。」路芙指電台因長期處於地庫，空氣流通欠佳，疾病容易傳染，她說：「我哋三個一齊主持節目，之前科林感冒，我同瑪姬輪流中招。」

擔心港人唔識驚

為確保DJ、歌手、藝人等衞生安全，電台每個小時都會更換一次咪套，Ella對措施大表支持，說：「我哋做呢行邊有得病？病到死都要做，所以一定要小心。」Ella續說最擔心港人覺得「豬流感」並非太嚴重，致命率也不高，所以唔識驚鬆懈下來，萬一爆發起來，後果將不堪設想，所以Ella叮囑大家要注重衞生。

文：音樂組