徐淑敏（Suki）對甜品的迷戀曾經陷入瘋狂狀態，連學業也幾乎荒廢來學整甜品；近期Suki又迷上糖水，一口氣買下五本糖水書閉關研究，希望在年內開店，甜姐兒與糖水結下甜美之緣。
甜品有特別元素令女士為之着迷。徐淑敏亦如普通女孩一樣有過迷戀甜品的歲月，她說：「曾經有一段日子簡直係瘋狂鍾意甜品，唔止鍾意食甜品，仲要學埋整添，嗰陣讀緊中七就嚟要考A-level，幾乎連書都唔溫去學整甜品，Tiramisu、唔同種類嘅蛋糕都識整，為咗甜品差啲荒廢學業。」
瘋狂去做
全心去做一件事，總是不會白費，差不多十年後，Suki在去年就推出了一本甜品食譜，問Suki當年是不是為心儀男士而學造甜品？她說：「唔係為咗男仔，我嘅性格係咁，鍾意一樣嘢就會全情投入，瘋狂去做，當時整甜品畀人試食冇分男女，正確嚟講女仔試得仲多，男仔都唔係咁鍾意甜品嘅。」
擱置買樓
對甜品如此有興趣，又會否開舖將興趣轉為事業呢？Suki說：「最近對糖水好有興趣，仲一口氣買咗五本書學煲糖水慢慢研究，希望一年內可以儲夠資金開一間糖水舖，當初諗一係買樓、一係開舖頭做生意，最後都係決定揀開舖，創業都係趁後生開始好。」
採訪：影視組 攝影：司徒國榮 場地：Balalaika（諾士佛臺） 服裝：Kookai