泳兒自爆入行身價$10利是

泳兒、鍾舒漫（Sherman）及湯怡昨日出席大快活新店開幕禮，吸引不少歌迷捧場，三人即場大顯廚藝炮製多款美食，並獲大會總裁舉手指公大讚好味，氹得三女笑逐顏開，對於古巨基落實以二千萬元加盟英皇，身為師姐的泳兒坦言對二千萬流口水，說：「我好恨呀！」隨即自爆當年透過參加新秀而成功簽約英皇，所得的酬金只有十蚊利是。

鍾舒漫膝頭哥有難，仆到瘀晒。

泳兒（右二）與師妹湯怡（右）及鍾舒漫於現場炮製美食。

入行賺咗200萬

泳兒自知失言，隨即補鑊說：「我每月都有人工及車馬費(o黎)！」問到入行至今是否賺到二千萬？泳兒說：「唔知，不過二百萬一定有。」至於有傳即將與英皇約滿的謝霆鋒有意跳槽，泳兒說：「傳啫！（一山不能藏二虎？）以前就可以咁講，依家係百花齊放。」

Sherman好易瘀

而Sherman被發現雙腳留有不少瘀傷，她說：「我對係棉花腳，好易瘀。」並指住右膝頭說：「呢撻係半年前喺尖沙咀行街時成個人仆喺街度，連眼鏡都飛甩埋，當時得我一個人，好狼狽同冇人幫，企埋一邊即刻打畀朋友。」有傳她與Sun Boy'z成員Steven拍拖，問到是否打畀對方？Sherman否認說：「唔係。」

文：音樂組