傅穎（Theresa）前晚與方珈悠、陳柏宇及余文樂等出席時裝店開幕活動，對於日前金牌大風CEO陳輝虹直言她要「執下先」，Theresa解釋這是輝虹的口頭禪：「我睇咗報道仲話我轉行，梗係唔會啦，我一向都多方面發展。」她認同走音事件令她留下負面印象，因此她與公司均認為要更多時間準備新碟，否認公司放棄其歌唱事業：「嚟緊喺廣州都有音樂活動。（公司承諾出碟？）唔知係唔係，總之有講過，應該係年尾或者出年年頭，要克服緊張同壓力先，上次走音之後，成日覺得下面啲人等緊我走音。」
對於死敵鄧麗欣有碟出，Theresa不會眼紅對方，坦言每個藝人亦有機會出碟，問對方同樣走音但仍有碟出，會否感到被針對？她說：「我唔介意亦唔會逃避，只係希望可以成為past tense（過去式）。」
