本文重點
「整容嬌娃」Freeze出席《美女廚房》錄影時，煮鴨掌的石詠莉指主持人方力申「好鹹」，小方即時反擊，揶揄石詠莉是「假奶」，罷吃Freeze炮製的「大良炸奶」，兩人你一言我一語「互片」，終於玩出火！
樂壇組合HotCha、Freeze及李蘊、龔嘉欣和陳思靜前晚出席無綫節目《美女廚房》錄影，期間她們試煮「大良炸鮮奶」、「竹笙魚肚湯」、「百花鮮掌」三味菜，當中Freeze雖然睇落煮得有板有眼，不過當評判艾粒、Shine及主持人方力申、鄭中基、梁漢文試食時勁踩三女廚藝，梁漢文先嘲魚肚似衞生巾，小方則指鴨掌較鹹，Freeze成員之一石詠莉即反駁稱：「咁咪似你囉！」小方聞言立刻黑面，縱使石詠莉即補鑊謂：「我係講你游水啲水好鹹！」不過他依然怒氣未消，不但拒試食Freeze所煮的炸鮮奶，更謂：「唔食炸奶，啲奶假嘅！」
畀分自稱好大方
此言一出，令向來有整容嬌娃之稱的Freeze十分尷尬，而小方好兄弟鄭中基亦踩多腳表示：「我聽到晒你哋嘅對話，全部都唔使試。」不過，小方畀分時亦給予Freeze八分，更揚言自己好大方，至於梁漢文畀分時，就打圓場指不論奶真定假，味道都算OK。
事後，石詠莉謂： 「話方力申好鹹都係講笑啫！唔講邊有得笑吖！周中夠話自己好鹹，雖然佢叫小方，不過佢好大方。（小方黑面喎？）佢唔會嘅。（話你假奶？）自己知道自己係真就得，絕對唔驚。」而陳樂榣則認為主持人只是喜歡說笑，有「僭建」疑雲的甄穎珊卻全程未有出聲。
心：Regen摸墨魚喪喊
另外，錄影期間HotCha表現得雞手鴨腳，Regen除摸墨魚時當場流淚外，煮餸時竟忘記開火，而Crystal將墨魚鑿成膠時不慎鑿穿碗，十分搞笑，事後當HotCha將菜派給現場觀眾試食時全被吐出，可見十分難吃。
文：影視組