謝天華、李綺虹、曹敏莉（Mandy）前晚於酒店泳池拍外景，天華艷福不淺，與Mandy、綺虹都有咀戲，但Mandy笑言天華之前拍咀戲時自加戲份，錫面變錫嘴，錫嘴變長吻，事後天華笑指她中文差，看劇本不清楚。
自問經驗淺
天華、Mandy及綺虹前晚於酒店泳池為劇集《老公萬歲》拍攝，當中分別有天華抱起Mandy及天華掟綺虹落水然後強吻她的激情戲。Mandy笑言之前與天華有場咀戲，但大呻對方自加戲份：「佢自己加咗啲，錫面變錫嘴，錫嘴變長吻，都切合劇本，導演話OK，如果為套劇OK嘅！事前有溝通，但永遠有加無減。」對此天華謂：「我唔怪佢，佢喺外國返嚟中文差睇劇本唔清楚，最緊要接受得到，唔係無厘頭加嘅，一定合情合理。」
至於天華與綺虹拍的咀戲，拍前天華表示相信綺虹有經驗：「我經驗比綺虹淺，要佢帶住我，佢應該會放啲。」綺虹說：「天華唔使我帶，佢好叻發電，我望佢眼神已畀佢電倒。（拍前會否溝通？）一般都冇乜嘢，一埋位就嚟，最怕佢緊張。」
三哥闖疫區
《老》劇昨舉行拜神，苗僑偉（三哥）坦言見張可頤多過見老婆，他計劃到疫區美加探朋友，但會戴口罩，平時為健康亦會飲淡鹽水，而可頤則讚三哥是好對手。
文：影視組