【譚倩宜上海直擊】蔡卓妍（阿Sa）成影壇搶手貨，落實接演爾冬陞（小寶）新片之餘，更有指她與鄭中基即將合拍賀歲片，雖然阿Sa極力否認已接獲通知，不過卻不排除與緋聞男友「有銀齊齊搵」。
阿Sa昨與劉嘉玲齊齊現身上海，出席Swarovski CRYSTALLIZEDTM旗艦店開幕儀式，更與創辦人玄孫Markus Canges談笑風生，吸引大批途人圍觀，場面熱鬧。
期待夥拍小寶
對於被傳與鄭中基將合拍賀歲片《花田囍事2010》，阿Sa與經理人霍汶希口徑一致說未聽過：「若果劇本啱嘅唔抗拒，有啱嘅工作都可以一齊做。（床上戲呢？）到時先算啦，接吻戲以前都拍過啦。」據悉，阿Sa稍後即將接拍小寶新片《鎗王之王》，戲中扮演護士的她與吳彥祖配成一對，由於從未與二人合作過，阿Sa對接拍《鎗》片大感新鮮，並期待盡快與台前幕後會面。
嘉玲攞表等生
劉嘉玲則忙為新片《狄仁傑之通天帝國》做準備，因拍戲有滿足感，辛苦一樣繼續拍，故不會像關之琳般宣布退休，會否押後生仔？她則說順其自然：「我都同個天攞咗報名表格嘞，其實有咗都可以拍戲，接落啲廣告都冇話唔畀大肚。」又說即使科技再發達，也不會逆天而為搵代母生仔或雪藏卵子，她明言享受大肚過程！
談到郭台銘添丁，有否見面恭喜對方？嘉玲反應頗大的說何以要見面：「朋友都未必要見啦，我喺上海夠多朋友嘞，都戥佢開心嘅。」對有指她早前在台灣喪玩，嘉玲說年輕時想玩就玩，但已隨住年紀轉變，這方面梁朝偉很尊重她。