衞蘭（Janice）因妹妹衞詩（Jill）的藏毒事件承受各方壓力，在百感交集下完成英文專輯錄音。現在Jill閉門思過，等待重新出發，生活回復正軌的Janice終於笑容再現，希望努力賺錢，打本給妹妹開舖發揮「飾」藝才華。
過去三個月，Janice猶如經歷一場暴風雨。對於妹妹犯錯，Janice首次披露感受：「啱啱撞正錄音期，情緒好混亂，好複雜！」當時她不想一個人呆在家胡思亂想，反而向公司求如期錄音，繼續努力工作。
拉近三父女感情
Janice在事件中學會從另一角度看事物：「當時係冇人幫到我，雖然公司同事朋友都開解我，但面對困難係要自己幫自己，要fight贏自己，可能呢啲就叫開竅啦。」她又認為妹妹犯錯是福不是禍，因可將三父女的感情拉近：「唔經歷今次嘅事佢未必會醒，唔會學識珍惜所有嘢。」
訪問過程中，Janice透露了妹妹近況：「佢學國語，又鍾意自製首飾，呢方面佢好有天分。」當她知道妹妹喜歡設計首飾後，即時在網上訂了很多有關設計書籍送給Jill，希望對方好好利用這段時間，將設計才華好好發揮。她說：「雖然工作上要分道揚鑣，但自己新碟有好成績，到時儲多啲錢可以開舖頭畀妹妹。」
妹妹成動力泉源
Janice指妹妹已變成她動力泉源：「當時入到錄音室，每錄一首歌，個腦都會諗住喺外邊嘅妹妹去唱，呢個power係一種好大嘅推動力，以前錄音冇呢種感覺。」Jill至今仍未聽過姊姊為她所唱的新歌，Janice表示：「七月出碟，我都好想佢快啲聽到。」
對於老闆黎明最愛講金句，Janice笑言：「有時佢講完啲嘢，我四、五個鐘頭後先明，咁佢聰明嘛，我唔夠聰明。」她很感激黎明給予信任和支持。
因Janice是「雙生兒」，記者特別找來一對「小孖妹」黃雪妍與黃心妍為她作伴。Janice見到「小孖妹」後，很自然想起與Jill小時的點滴。而小孖妹更即場獻唱兒歌，手舞足蹈氹得Janice開懷大笑。
文：音樂組