彭慧君學美甲吸明星客

曾是圈中煞食靚女模特兒的彭慧君（Alice），算是上一代的靚模典範，隨着近年靚模湧現，人人青春無敵，Alice不禁要為自己將來打算，早前立定決心學美甲，一於學一門手藝靠雙手食飯，她說：「其實係因為自己一直都好鍾意整指甲，覺得好靚，最初諗住學嚟自己幫自己整，可以慳番啲時間，點知愈學愈有興趣，仲考咗好多證書，慢慢試吓幫朋友整，佢哋個個都讚，仲鼓勵我開舖添。」

施念慈搵朋友捧場

去年Alice鼓起勇氣租舖開店，在短時間已吸納一班明星客幫襯，如薛凱琪、楊愛瑾和不少模特兒都是她的長期客，Alice說：「我都估唔到佢哋咁幫手，好多人聽到我開舖都主動話要嚟試，其中施念慈就係最幫手嘅一個，佢除咗自己幫襯，仲介紹咗好多朋友添。」

施念慈坦言最欣賞自強不息的女孩子，她說：「依家金融海嘯，好多人都賴大環境而唔肯自己努力，我覺得任何時候，做女仔都要有一技之長，咁樣先可以有自主權，可以自己話事。」Alice坦言金融海嘯之下，店舖生意雖略受影響，但深信跨過逆境自然會海闊天空。