已有四年沒有在港搞個唱的林子祥（阿Lam），將於下月五至六日假紅館舉行「十分十二子祥演唱會」，歌迷最關心阿Lam會演繹哪首金曲外，相信最想「八卦」的莫過於阿Lam同葉蒨文（沙麗）是否已「愛到退燒」？加上在日前的個唱記者會上，昔日和阿Lam出雙入對的沙麗竟然「冇影」，更令人感覺傳聞空穴來風。
陪妻打羽球
被問到這敏感話題，阿Lam非但沒有黑面，反而相當大方地說：「因為佢阿爸病咗，佢（沙麗）仲喺加拿大，但我開騷前佢一定會嚟。（之前沙麗有新緋聞？）我哋冇事，都結咗婚成二十年，每段婚姻都有唔同階段，唔會原地踏步，我哋心裏面互相支持對方。」
阿Lam漏口風說現時仍如當年般贈送小禮物給沙麗，其中不乏驚喜之作，他偷笑說：「我都好鬼馬！」至於近年少見兩人拍拖打高爾夫球，阿Lam代妻澄清：「沙麗都有陪我打高爾夫，但佢又鍾意打羽毛球，成日同羅太（朱玲玲）一齊打，我都有打㗎，但羽毛球要跑嚟跑去好辛苦，我老咗，都係動作較慢的高爾夫球啱我啲！」
欣賞張敬軒
在過去的四年，阿Lam走遍半個地球巡迴演唱，工作從來沒有間斷，收入自然豐厚，但他卻自爆十分「平民化」，常搭公共交通工具，就連出席記者會也不僱用保母車，阿Lam強調這絕對和經濟無關，他解釋：「我好鍾意行路，我試過由旺角行去尖沙咀，再搭小輪到灣仔再行返跑馬地寓所！搭公車有乜問題？都不知幾方便。（但你係殿堂級歌手喎？）咁喺舞台、鏡頭下，我都係普通人，我又紅得去邊呀？其實我當年可以再紅啲，但我唔鍾意同人爭！」今年阿Lam已62歲，但他從沒想過退休，因為他覺得音樂及工作能保他青春不老。
此外，阿Lam對後輩張敬軒寵愛有加，在軒仔即將推出新碟《Love & Living》第二版內，特別收錄他為軒仔寫的《相對論》合唱版，兩人又拍攝了一段深情對話，阿Lam說：「好睇得起軒仔，所以寫首高難度歌畀佢。」軒仔對能跟阿Lam合作覺得很榮幸。
採訪：音樂組