廖碧兒一向是可人兒，十二歲生日已獲父母安排在郵輪上舉行神秘派對，並有法國廚師送蛋糕兼獻吻，未知緋聞男友陳豪會否照辦煮碗為碧兒送上驚喜呢？
廖碧兒由加拿大來港發展，父母為照顧愛女要經常兩地飛，但最近北美地區的豬流感（H1N1甲型流感）擴散得很快，難怪令碧兒十分擔心，她說：「原本想趁母親節，叫媽咪嚟香港一齊慶祝，但因為擔心搭長途飛機，焗住喺一處地方太耐好容易染病，所以我勸佢留番喺加拿大，好彩我哋住嘅州離溫哥華呢啲大城市好遠，所以情況應該會好啲。」
法國廚師獻吻
現在碧兒要忙於工作，與父母聚少離多，談起童年的開心事特別興奮，她說：「因為Daddy有隻船，雖然唔係好大，但一家人經常會出海玩，試過凌晨四點起身釣魚，好得意。」
碧兒更試過在郵輪上慶祝生日，她解釋：「嗰年只得十二歲，父母喺郵輪上幫我安排咗一個神秘生日會，有好多得意公仔陪我影相，仲有位法國廚師送蛋糕出嚟，仲錫咗我一啖添。」問到將來度蜜月地點係咪都要喺郵輪上？她笑說：「我都係鍾意腳踏實地，其實我有少少暈船浪。」
掛狗多過陳豪
碧兒每次提起緋聞例牌耍太極，並會以愛犬做擋箭牌，早前她進軍荷里活拍攝動作片，問到是否要與陳豪分隔兩地？她即說：「我同狗仔分開咗三個月，好掛住佢哋就真！」
她還自爆與狗仔玩視像，她說：「我太掛住佢哋，所以咪叫Daddy抱住佢哋喺電腦面前，然後再同佢哋傾偈，佢見媽咪（指自己）辛苦，都有氹我開心。」碧兒當正愛犬是仔女，她直言現在放假都不願外遊，寧願留在家中好好休息，弄狗為樂。
文：專案組
攝：馬永堅
場地：金鐘太古廣場
服裝：Bally