貴為《美女廚房》主持人之一兼已婚的梁漢文（Edmond），日前出席電台節目時，親自餵麵給西裝男fans品嘗，甚有「斷背」feel，惟男fans竟冇面畀大潑冷水，除給Edmond負20分外，還大彈味道太鹹，場面惹笑！
自言是煮麵能手的梁漢文，日前擔任森美和小儀電台節目《早霸王》的嘉賓，並邀來Edmond一位男歌迷齊作直播。最近力谷新歌《住家丁麵》的Edmond表示，由於現場沒有煮食用具，故事前只能用微波爐叮麵，而「叮麵」步驟看似簡單，實質亦要留意細節，例如水的分量及時間的控制等等。
鴛鴦補鑊
不過Edmond表現蝦碌，連微波爐開關也找不着，「叮」完麵後又心急徒手取走碗麵，結果熱到燙手，認真論盡，跟住Edmond「運麵」到直播室，並即場餵給西裝男fans吃，「森小」要求對方即時評分，場面「溫馨」又搞笑。
雖獲偶像親自餵食，但男fans似乎並不領情，當他品嘗過後，竟毫不留情給即食麵的味道負20分，兼說：「啲麵太鹹呀！」Edmond則不忿氣帶笑反抗：「點會鹹呀？你係咪食齋㗎？」他更叫森美和小儀試味，雖然最近豬流感（H1N1甲型流感）肆虐，惟「森小」毫無懼色，用同一雙筷子夾麵吃，森美更索性用手撈麵，兩人均吃得津津有味，為Edmond成功平反。
及後Edmond用半杯咖啡和奶茶，炮製最簡單的鴛鴦給西裝男品嘗，才令fans讚不絕口。
減少夜蒲
Edmond自言對煮麵甚有研究：「我只係識煮麵，連煎蛋都唔曉。（太太試麵？）我係咁樣識佢番嚟。（變住家男？）呢幾年過咗夜蒲階段，都冇咗嗰個蒲癮。」
採訪：German