本文重點
鄭中基（Ronald）昨日接受本報獨家專訪，承認早前在電視節目中輕言，再次重申不會繼任爸爸鄭東漢於金牌大風的任何管理層工作。當提到女友蔡卓妍（阿Sa）時，Ronald即甜在心頭，更透露諗過與阿Sa拉埋天窗。
「金牌太子爺」Ronald最近頻頻就古巨基轉會的事上明嘲暗諷，更聲稱被「拖落水」而扯火。但被本報踢爆他曾在電視節目中親口承認會慢慢接管父親的生意，似乎是自打嘴巴。
與基仔非十冤九仇
Ronald昨日接受本報獨家專訪親自解釋「接棒」傳聞，他承認在節目上輕言，他說：「我係有咁講，但當時可能環境未係咁敏感，依家我斬釘截鐵咁講，我絕對唔會做CEO，唔會做管理、行政方面嘅嘢，爸爸一早知道我呢個決定，佢都冇失望。（爸爸退休點算？）呢個佢有自己決定，我能力只係盡量做好工作，幫公司賺多啲錢。」Ronald更稱會用行動證明一切，對接棒的事不再作任何回應。
他又坦言與基仔並非十冤九仇，會祝福對方有更好前途。態度顯然軟化的Ronald說：「如果有人真係用我CEO呢單嘢去造是非，咁我當然嬲啦！我唔知係咪佢，但咁多報道都係咁寫，我覺得空穴來風囉，好難揣測。」
揚言不做CEO的Ronald，問到阿Sa有何看法時，他即甜笑地說：「佢都唔想我做CEO，連導演佢都唔想我做，佢見我好辛苦，成個人謝晒咁，但工作嘅嘢佢就唔會過問嘅，只係叫我唔好死撐。（感情穩定，有冇諗結婚？）前排都輕輕諗過吓，不過應該唔會呢幾年嘅事。」
Mani出於惻隱之心
近日霍汶希（Mani）挺身為古巨基發言反擊，令基仔加盟英皇的傳聞更甚囂塵上。昨日Mani接受查小欣的電台訪問時解釋：「佢係咪加盟仲未落實，一切都係容後公布。但我聽到啲報道覺得好負面，基仔雖然唔係我自己嘅藝人，我出聲講嘢都只係出於惻隱之心。」
另外，《美女廚房》監製錢國偉證實，期待已久的阿Sa將於六月參與錄影，安排於第十八集播出，他笑言會將「Sa基」當一對新人般整蠱。
文：音樂組