傳即將加盟英皇的基仔備受攻擊，昨晚英皇高層霍汶希（Mani）表示：「係咪加盟遲啲公布。（有人話基仔唔飲水思源？）唔好整呢啲稱號，樂壇應該健康成長，蘋果唔好咬得咁爛，我哋以前都有士多啤梨、橙跌落地，但都好完整交畀下一手，唔好攻擊人，藝人身上加罪名好可憐，一線歌手買少見少，冇必要整死。（怕唔怕多是非？）唔會，轉會多是非係定律。」
因為基仔不續約金牌，「金牌太子爺」Ronald和香港區行政總裁陳輝虹前日聯手寸爆基仔，Ronald還口口聲聲否認將來會接任CEO，不過，本報發現Ronald於4月23日接受梁奕倫主持的《今日VIP》訪問，曾親口說過會接掌家族生意。
當日話點都要做
當日梁奕倫問Ronald有冇興趣做CEO？他說：「點都係自己屋企生意，遲啲囉，點都要做嘅，但要慢慢學，唔係話做就做到，都要知道公司運作，各部門點做嘢，呢啲完全唔清楚，如果做要慢慢由低做起。」當時同場的梁漢文讚Ronald聰明適合做CEO，方力申更笑說：「最緊要friend，傾合約易啲，其實我事業下滑，但唔緊要，簽多3年。」Ronald笑到四萬咁口，梁奕倫問他：「咁多friend係咪好難做？」Ronald笑說：「所以咪係咁拖，唔好搞住，做好分內事先。」不過，貴人事忙的Ronald卻忘記曾說過這番話了！
自打嘴巴好面懵
至於被調職電影部的黃栢高（Paco），對於有傳基仔過檔英皇？他說：「雖然件事未經證實，如果係真，我會好失望。（對基仔失望？）當然係啦。（有冇同基仔聯絡？）我哋冇聯絡。」
由於事件導火線是黃栢高被調職，有雜誌指Ronald向老竇鄭東漢篤Paco背脊，昨晚Ronald和梁漢文（Edmond）在無綫錄影節目，Ronald否認有告狀：「畀人拖落水，拖到濕晒，一而再再而三講過唔會做CEO，第時做即自打嘴巴，好面懵！」Ronald和Edmond一人一句寸爆基仔，Edmond撥火說：「等於啲人話續又唔續，咁叫面懵嘞！」
文：音樂組
鄭中基訪問片段
http://mytv.tvb.com/entertainment/greenroom/22651