謝安琪（Kay）前晚在處女演唱會上大騷唱功及豐滿上圍，穿上低胸連身裙時唱到忘形露半球；Kay全晚表現緊張，多次唱錯歌詞又走錯位，頻頻甩漏，連Kay亦不禁自嘲說：「真係亂七八糟……」
禾稈冚珍珠的謝安琪在個唱上換了七套靚衫，當中兩件極具性感，Kay罕有露波罅，惹來不少男歌迷
嘩鬼叫。由於Kay首次舉行演唱會，全晚表現緊張不停唱錯歌詞及走錯位，Kay說：「真係亂七八糟，今日好多甩漏，多謝大家包容。」
突然嗚咽
當Kay介紹歌曲《但願人長久》時突然嗚咽，有感而發說：「其實做歌手條路唔易行，入行時同自己講係做歌手，其他嘢唔識，只係知鍾意唱歌同音樂。」Kay續說：「今朝起身諗起呢首歌，好想喺度清唱畀父母聽。」隨即眼濕濕唱出樂隊朱凌凌的歌曲《我們五個小孩》，當中改了少許歌詞，身為人母的Kay坦言如果有途人指其愛子張瞻唔得意，她會即時燶面。
記者大讚她有「睇頭」？Kay笑笑口尷尬說：「自己都畀好多驚喜畀自己……因為個台不停改建，所以唔敢四圍行。」
刻意着Girdle
Kay透露為谷胸刻意穿上Girdle，對於唱錯歌詞，Kay解釋說：「因為緊張成個腦好亂，原來開演唱會會聽到無限咁多把聲，好多人透過耳機同我講嘢。」近日是非纏身的Kay慨嘆歌手生涯很短暫：「唔知可以做到幾時，希望可以留喺歌迷心中。」
採訪：音樂組