昨日謝婷婷出席黃金海岸遊艇展2009，並為Versace春夏時裝展擔任模特兒，對於有疑似Rihanna的裸照外流，婷婷坦言從未拍過這類照片：「我諗都未諗過。（有冇男友要求過？）一定冇，我啲朋友都好正經。可能啲人覺得我好硬朗，所以問都唔敢問，驚我會一拳打埋去。（男友安志杰有冇問過？）梗係冇。」
同場有模特兒示範泳衣，婷婷直言不會行泳衣騷，問到在沙灘可會穿比堅尼，她說：「會。（唔驚畀人偷拍？）唔驚，學我阿爸講去沙灘唔着比堅尼，唔通着晚裝！我好鍾意遊船河，但怕曬黑，有年半冇曬太陽。」她又稱喜歡看遊艇雜誌，希望擁有一架遊艇，但若有錢會先買樓置業，因為較實際。
