蔡卓妍（阿Sa）與張敬軒昨日齊齊現身活動，軒仔就地取材送木瓜給阿Sa，阿Sa「以果還果」為軒仔送蕉，場面搞笑。
阿Sa與軒仔昨出席電台祝捷會，兩人幽默感大發，先有軒仔為阿Sa搶木瓜補身，阿Sa亦即以蕉回敬，令全場笑翻肚皮，不過對於軒仔好意，阿Sa就只有心領，阿Sa說：「夠喇（指身材），OK咪得囉，最緊要自然，太大嚇死人，唔襯我！」
唔介意男友紋身
阿Sa續稱自己無意僭建，因為承受不了僭建後的輿論壓力。有傳鄭中基曾為阿Sa紋上「愛的紋身」，記者問阿Sa會否介意另一半整容，包括紋身？阿Sa冧笑說：「紋身係整容嚟咩？鍾意一個人，佢做乜都鍾意㗎啦！」
問軒仔為何贈阿Sa木瓜？軒仔醒目地說：「送禮畀朋友，梗係送啲抵食夾大件啦，都補吓囉（阿Sa身材唔好？）唔係，阿Sa真材實料，感覺到壓迫感（阿Sa送蕉？）係呀，以形補形！」軒仔又透露，最近為增肥食蕉兼蛋白粉，令脾氣暴躁，問他如何紓緩？他說：「多飲水囉，夜晚有時都瞓唔到，囉囉攣。」
對於阿Sa經理人霍汶希（Mani）被王傑公開指摘，阿Sa為Mani抱不平說：「Mani係搞笑人，有人可以開玩笑，有人開唔到！」至於緋聞是否可幫助人氣，阿Sa坦言緋聞會令藝人曝光率增加，不過緋聞屬雙方面，而且不少緋聞亦會因合作而產生，毋須自己製造。
對工作從不揀擇
有指Mani曾打算親自出動與王傑傳緋聞，對此阿Sa笑言：「咁得意？Mani冇提出過同我傳喎（你出席過唔想出席嘅活動？）會有，但公司有商量，唔會強迫（飯局？）從來冇去過，我係咪要檢討吓自己？」阿Sa自言敢言，但不會因知名度增加而推工作。
採訪：音樂組