剛簽約陳冠希（Edison）旗下的何超儀，反叛症發作，竟密會Edison死對頭麥浚龍（Juno）傾合作時裝品牌，擺明落陳冠希面！問超儀跟Juno合作會否擔心Edison嬲？一向膽生毛的她直言「冇有怕！」
做事素來我行我素的何超儀，雖然簽了陳冠希公司旗下，但她與Juno私交甚篤，故有不少合作計劃，當中更包括Juno跟Edison鬥個你死我活的時裝生意，擺明唔畀面Edison！日前，傳媒便拍得超儀夫婦、Juno、王精甫飯聚，商議合作大計，期間，超儀更將自己設計的時款手袋及電影《維多利亞壹號》海報給Juno看，記者還發現該電影海報以麥浚龍警察爛面造型做主打，都可說相當關照！
展示袋表作
事後記者致電超儀，她承認跟Juno正商談合作計劃，包括電影及時裝方面。剛簽為陳冠希旗下，仍跟其死對頭合作無間，問她可會擔心Edison不快？何超儀表示：「唔怕，咁大個人，做嘢點會混為一談呢！可以嘅話，我都想同Edison合作搞啲有關時裝嘅計劃。（你攞咗一個印有機關槍造型嘅手袋畀Juno睇？）係，因為我之前同朋友夾份出咗隻牌子，搵咗幾個藝人做設計師，包括我自己、徐濠縈、Lisa S.咁，我咪攞咗自己設計嘅手袋畀Juno睇下，佢係潮流達人，想問下佢嘅意見。（點解《維多利亞壹號》搵Juno做海報主打？）呢個係外國發行商嘅決定，因為我哋會攞呢套片去康城電影節，設計咗幾款電影海報出嚟，預備攞去康城做宣傳，最後外國發行商揀咗呢張。」
有選擇自由
至於Juno方面，則表示與超儀、陳子聰認識多時，一直都想合作，終於齊齊坐低傾下一些合作計劃，問他跟簽了陳冠希的超儀合作，會否有點尷尬？Juno表示：「超儀有好多好朋友，佢亦可以選擇自己嘅生意夥伴，唔到我去評論。」
另外，何超儀接受有線訪問，談到自己第一次出唱片時，賺到的錢都給了父親做「家用」，超儀直言雖然只是萬多元，但她很希望父親知道自己有賺錢能力；而談到簽Edison旗下，超儀則讚他是推廣能手，做事頭頭是道，很欣賞對方。
文：影視組