戚黛黛、徐自賢（Jessica）、郭力行（Rico）與梁俊軒（Bonald）屬同一經理人公司，之前他們都分別為亞視拍劇、唱歌及主持節目。現時金融海嘯，為求生存，藝人各出奇謀，對於行性感，黛黛與Jessica意見不一，而Rico與Bonald則堅持以創作才華取勝。
戚黛黛、徐自賢、郭力行與梁俊軒四位年輕人的發展各有不同，黛黛與Jessica分別以拍劇及主持為主，而Rico與Bonald則專注於樂壇發展，現時經濟不景，藝人工作及酬勞減少，不過他們坦言不太擔心。
徐自賢騷料趁後生
黛黛與Jessica快將約滿亞視，對於亞視減少製作，播放台灣《中天電視》節目，二人坦言雖然競爭很大，但有競爭才有進步。Jessica說︰「有競爭先有進步，最緊要係自己心態，我都想參與台灣嘅節目，一來自己講國語比廣東話仲好，二來台灣節目夠輕鬆，好啱我。」問她會否介意行性感爭取工作機會，她坦言︰「性感得嚟唔賣弄都可以接受，後生唔show幾時show呀！不過之前車禍留低嘅疤痕仲喺度，要改善吓先。」不過黛黛一聽行性感則謂︰「唔得，睇吓乜嘢程度，叫我着泳衣拍嘢點都唔係咁想囉！」黛黛主攻主持工作，更坦言有機會都想一嘗做大型節目主持，故此她不時自我增值，更勤學普通話，希望工作範疇更廣泛。
郭力行主攻合唱歌
至於Rico之前有參與《法網群英》演出，六月中又會推出他的第三張唱碟，問他市道低迷，會否感到壓力大，他說︰「冇得緊張，平常心去做，我只想畀人知道我對音樂係有熱誠。」之前與呂晶晶合唱國語歌的他表示會主攻合唱市場，他謂︰「我都想同啲新人合作，唔知公司會唔會簽多啲女仔，我覺得合唱歌會較受歡迎。」而前組合Sky成員之一的Bonald八月亦會推出唱片，今次更作曲、編曲、主唱一腳踢，問他有否想合作已久的對象，他坦言︰「我好鍾意曹格，佢好有個人風格，希望有機會可以合作。」說到男藝人搵真銀比女藝人機會更少，Bonald謂︰「依家全世界一齊辛苦，所以唔會唔開心，自己之前都客串過電影演出，之後仲有啲casting，所以唔太擔心。」
採訪︰影視組 攝影︰秦健輝 服裝︰２％ 帽子︰mr-weather 單車︰金寶單車行