靚靚避人流阿徐唔出埠

為慶祝Stella McCartney中環置地旗艦店開幕，前晚舉行雞尾酒會派對，徐濠縈（阿徐）以掃把頭示人，嚇怕身旁的袁詠儀（靚靚）。已為人母的二人被問到豬流感爆發？她們都不約而同地大叫怕怕，靚靚說：「我已經託相熟嘅醫生買口罩，我仲幫朋友買埋。（會唔會少出街？）我會留意情況，如果個仔學校多人咳，我唔會畀佢返學，我盡量少帶佢去多人嘅地方，而且我返到屋企，做晒清潔先掂個仔呀！」

徐濠縈以新髮型掃把頭亮相。	謝婷婷表示加強個人衞生，會勤加洗手。	趙碩之（右）與戴夢夢（左二）夥師妹楊蕾（右二）及尹蓁晞（左）出席活動。

隔離掃把頭

身旁的阿徐坦言都很擔心：「學校都張貼通告，要小朋友勤洗手同注重衞生清潔。豬流感又唔可以打預防針，惟有暫時唔去美國同墨西哥，希望唔好傳到嚟香港，我身為媽咪真係驚！我同個女講摸完鼻同掂過地下之後，都要洗手。（Eason成日出埠，叫佢小心啲？）佢依家喺大陸做嘢，一家人中我最多病，反而我個女最強壯，你哋應該問候我呀！」其後她又笑言自己的掃把頭載滿細菌：「如果要隔離，就隔離我個頭先！」

Rosemary以大露背裝上陣。

邱李茂琪為小朋友着想，亦取消出埠計劃。

婷婷勤洗手

同場，謝婷婷表示自己亦勤洗手，透露大嫂張栢芝原本打算到新加坡，為免兒子受感染而取消行程；而另邊廂的邱李茂琪亦取消所有出埠計劃：「我買晒口罩同消毒藥水，學校亦教我哋家長，小朋友返屋企前，要用消毒藥水由頭噴到落腳，有兩聲咳都建議唔好返學。」而當晚出席嘉賓眾多，包括有Rosemary、趙碩之、戴夢夢、鄧愛嘉、黃寧艷、莊思敏等。

文：名人組