早前本報率先報道黎明雖堅持跟Jill解除唱片合約，但口硬心軟的他卻保留經理人合約，為Jill鋪定後路。昨日黎明以「海洋公園保育基金關懷熊貓大使」身份出席「亞洲動物天地」開幕活動，並到館內欣賞小熊貓、大熊貓、水獺和揚子鱷等動物，黎明邊看邊手持相機不停拍攝，表現雀躍。
由老闆變回同事
當接受傳媒訪問時，黎明馬上變得嚴肅，記者問他Jill可有親自致電道歉？黎明有備而來說：「今日我想簡單啲講實質答案畀大家，唔想再喺新聞片上圍繞，再提佢（Jill）會唔開心，Amusic從佢第一次發生事已經話咗唔要佢，到第二次明確發生事後已經即時終止合約！」
雖然黎明坦言對Jill今次藏毒感到有一瞬間失望，但身為老闆的他亦早已為Jill未來鋪路，黎明說：「Jill嘅經理人合約將交由陳善之處理，即係我經理人安排佢做幕後或電影工作，我同Jill亦變番同事，呢件事亦告一段落，希望佢知道『塞翁失馬焉知非福』！」
對於有傳Jill無力償還巨額的官司費用，所以家姐衞蘭（Janice）要跟Amusic加簽三年合約為妹還債，對此黎明表示：「好多銀行都有壞帳，都需要撇帳，但每間銀行都有流動資金，公司唔會要衞蘭同衞詩還錢，會當撇帳咁，當追唔番，衞蘭亦冇加簽三年！」
Janice冇代妹求情
黎明又稱Jill今次事件對公司藝人楊千嬅、同事及奔波勞碌的傳媒不公平，但他一再希望Jill知道「塞翁失馬焉知非福」，問到Janice可有為Jill求情？黎明說：「唔會，大家係明白事理嘅人，我哋對得住Jill、公司、自己同大家，但做呢個決定唔易！（以後唔簽Jill做歌手？）你呢條問題越咗界！（事件會影響Janice未來發展？）我唔揣測未來，Jill喺我哋公司已經close files！」問黎明私底下是否已原諒Jill，他頓了頓說：「私下原唔原諒都唔會向傳媒解答！」
另外，黎明亦否認打本給女友樂基兒開模特兒公司，他指樂基兒跟現時公司相處融洽，不會破壞她和公司關係：「我從來唔會撈一啲自己唔識嘅嘢！」黎明亦露口風有意羅致Janice Man成旗下藝人，他說：「我有留意Janice Man，個人覺得佢幾有潛質，公司都希望同佢有合作空間。」未知黎明是否有意找Janice Man取代Jill？
此外，孫耀威對於有傳關楚耀（Kelvin）和Jill以視像聯絡，他表示：「我唔知道佢哋依家情況，亦不便評論，但如果係真，患難見真情係好事，證明佢哋經歷風雨，更加覺得佢哋值得大家尊重！」而張敬軒則透露Kelvin每日都很勤力練琴和寫歌，他還自爆：「我叫佢唔好同我爭飯食，佢仲騎騎笑！」
採訪：音樂組