昨日古裝新劇《蒲松齡》舉行拜神儀式，陳法拉、鍾嘉欣、馬浚偉、陳錦鴻等一眾演員均有出席，其中以一身官仔骨骨上陣的陳法拉，自言首次反串扮男裝，在劇中會與另一演員龔嘉欣發生「斷背」情。
擘大腳冇束縛
在劇中飾演狐仙的陳法拉，透露為下凡間，不惜女扮男裝，她表示：「第一次嘗試反串。（覺得自己英俊嗎？）幾鍾意，依家做動作可以瀟灑啲，坐低又可以擘大腳。（慣唔慣？）好慣，最唔慣可能係要壓低把聲講嘢。（反串做男仔事前有冇準備？）着啲sport bra同埋要着鬆身衫，如果唔係一叉腰就現晒身形出嚟。」
鍾嘉欣似吳尊
鍾嘉欣亦大讚法拉的男裝造型夠英俊，她說：「好英、好煞食，我哋成日笑佢，平時啲男仔個心口好平，但係佢就好大，遮唔到身材。（你想唔想試吓反串？）都想㗎。（個樣會唔會似吳尊？）會，尋晚睇金像獎，有留意吳尊，不過如果可以同佢拍戲，演兄妹一定好好笑。」
另外，姚子羚對張家輝封「影帝」表示高興，透露曾與對方做訪問，大讚對方沒有架子，十分親切。
文：影視組