入行廿年的張家輝「一擊即中」榮升金像影帝，自言是廉價勞工的他，打趣要灌醉老闆乘機加片酬，並坦言倘若片酬拍得上勁敵甄子丹的話，自己會宣布「榮休」。
在今屆電影金像獎候選影帝名單上，只得家輝每套戲叫價不足一百萬，難怪他笑指自己相當抵用，他昨日接受本報訪問時說：「甄子丹去年拍咗五套戲，以佢每套戲叫價一千二百萬嚟講，嘩！大拿拿六千萬喎，我即刻宣布唔做嘞。」
張家輝笑言要灌醉老闆楊受成，趁機加片酬，但他仍認為理想更值得尊重：「最緊要係得到公司承諾，畀多啲有質素嘅project我。當初我都係因為唔忿氣，點解人人以為我淨係識得搞笑，所以寧願坐冷板櫈都要搵機會轉戲路。嗰四年好難捱，事實證明我嘅諗法冇錯，我都要多謝當日自己嘅堅持。」
囡囡家中拍晒手
家輝得獎後連走三場慶功心情仍未平復，返家後終於有機會「摸吓個獎，回味一吓」，囡囡前晚在電視機前見到爸爸上台攞獎，即興奮拍手：「佢其實唔知發生乜事……最衰係冇人錄低佢嘅表情畀我睇啦，真係有啲遺憾。」
問到家輝在事業上還有甚麼追求時，他坦言：「連攞兩個獎，今次仲要『一擊即中』，咁啱仲要撞正香港電影一百周年，仲想點呀？畀埋個奧斯卡你好唔好？」
前晚家輝出席大會慶功宴時，將在場逐個記者熊抱及錫面，感激傳媒多年來對他的支持，太太關詠荷見狀忍俊不禁。家輝大讚其他四位候選人有風度，事前接受訪問時對他的演出予以肯定。家輝隨後到跑馬地會合老闆楊受成、導演林超賢及老友黃秋生等再開派對，且開香檳慶祝，期間家輝更拍下短片，向內地影迷「報喜」。
王晶冇睇錯叻人
家輝的伯樂王晶表示自己會識做調高他的片酬：「嚟緊八、九月應該會再合作，佢係underpay嘅，加佢片酬我心中有數。（家輝感激你嘅支持。）朋友嘅嘢係咁，我向來冇睇錯人，叻人我都唔會睇錯。（之前有人好反骨？）做人有好多個階段，有恩唔一定要報，識得尊重我已經好安慰。」
文：影視組