從影多年終圓影后夢的鮑起靜（鮑姐），在第28屆香港電影金像獎頒獎禮中勇奪「最佳女主角」，台上一段致謝詞中一句「多謝亞洲電視同事」卻遭無綫刪除，而「終身成就獎」得主蕭芳芳的致謝詞亦被剪，其他環節亦剪得支離破碎，情況慘不忍睹。事件立即引起觀眾不滿。網民群起網上留言狂插，斥其行為「不懂尊重別人」兼「小器」，有失大台的風度，又揶揄無綫「亂剪」應拿「最差剪接獎」、狠斥無綫不尊重就不要爭奪轉播權，甚至有網民指「睇到O嘴兼發火」，建議下屆由其他電視台轉播。而廣管局亦接獲十五宗投訴有關剪接問題，無綫方面亦接到十九宗電郵和電話投訴。
下一屆重新投標
與鮑起靜多年好友的爾冬陞亦不值無綫所為，慶功宴上為好友出一口氣，他勞氣地說：「我為咗呢單嘢好唔開心，我唔相信方逸華同邵逸夫會咁小器囉。（咁邊個Cut？）咪下低啲奴才囉，佢哋驚嘛。我覺得唔係幾好囉，人哋六十歲大壽拎呢個獎，點解唔大方啲呢？你刪咗『多謝亞洲電視』幾個字，唔代表人哋個收視會升，無綫會跌㗎嘛。我哋評審一定會開會問番呢件事。」
而金像獎主席陳嘉上亦坦言下一屆會重新投標，意味着轉播權未必在無綫手上，他說：「當然係感到失望，預咗佢會Cut，但要睇佢Cut咩。每年過後我哋都會開檢討轉播情況。」當晚司儀曾志偉亦表示無綫刪剪自己亦沒辦法，他說：「每個地方有唔同政策，亦可能係佢遲播嘅原因，我哋已經盡量爭取得獎者想講咩就講咩播出街。」
連趕三場慶功宴
問到當事人鮑姐會否覺得無綫很小器，她說：「我諗在商言商……在所難免，佢有權咁做嘅。」雖然致謝詞被刪剪，但鮑姐依然開心地連跑三場慶功宴，與好友盡興。
她先出席大會慶功，再出席許鞍華、陳麗雲及王晶主場的《天水圍的日與夜》慶功，其後再轉到山林道會合老公方平及女兒，出席好友方中信和爾冬陞為她而設的派對。派對上湯盈盈手持鮮花到場，她說：「啲花送畀張家輝。」凌晨三時許緋聞男友錢嘉樂先離開，十分鐘後湯盈盈帶醉而出，腳步浮浮，由助手駕車離開。至於獲「星光大道巡禮最佳衣着獎」的夏汶汐，亦出席大會慶功。另外，今晚（21日）亞視亦會為鮑起靜舉行慶功宴。
文：影視組