周麗淇昨晚起程到日本東北拍攝特輯，節目中會嘗試多個她的第一次，包括首次於鏡頭前浸溫泉，之前曾與過氣緋聞男友鄭嘉穎日本拍劇，她坦言不會觸景傷情。
周麗淇（Niki）昨日出席於板長壽司店舉行的《櫻紅醉了》特輯記者會，此特輯主題是幸福收集，Niki坦言會於廿多日的行程中尋找幸福。她說：「第一次去日本東北，我會揸車，已經攞咗國際車牌，監製搵咗一個八十歲嘅婆婆同行，我又會入住當地一個家庭，煮嘢畀佢哋食，仲第一次喺鏡頭前浸溫泉。」問她是否不披毛巾？她笑言：「唔包都出唔到鏡啦！」
影相趕出書
記者提及之前她與鄭嘉穎曾去日本拍劇，她聞言即說：「唔關事，多謝TVB用心良苦囉！（係咪邊度跌低邊度爬番起身？）黐線，冇呢啲事發生，跌乜嘢低呀！啋過你呀！」問Niki會否觸景傷情？她說：「唔會，今次係懷住期待心情去，我寓工作於娛樂，帶埋相機去影相，趕住書展出書，仲會為特輯主題曲填詞，睇吓成唔成功。」說到廿日中可能會有另一幸福的艷遇，Niki笑謂：「返嚟自有揭盅。」
老闆娘送禮
此外，老闆娘梁芷珊昨日都有撐場，還送了記事簿、相機給Niki，二人更與無綫高層何麗全飲日本清酒，何麗全爆出一句：「佢去到日本好多特殊感情。」Niki即尷尬說：「你唔知唔好亂講呀！」
從不飲醉的Niki將會在日本一嘗飲醉酒滋味，問她怕否醉後吐真言？她說：「唔怕，不過啲人話飲醉會又笑又喊，唔知自己會係邊隻，最怕係又嘔又地。」
文：影視組