Kama助手見位就坐，四位目擊事發經過的女藝人都站出來講公道說話。
李曼筠
「大會係有擺到人名紙喺個位度，但其實唔係咁清楚。原本Pinky坐喺我右手邊隔兩個位，再隔籬係Kama，之後Pinky去咗換衫，Kama個助手就坐咗喺Pinky個位度同Kama密密斟。Pinky返嚟見到個位有人坐，咪轉坐我左手邊咯，無幾耐Kama助手傾完偈走番開，Pinky就坐番自己原本個位喇，但全程都唔覺Pinky有咩唔開心。」
諸葛梓岐
「本身我坐二號枱，因為我想同我髮型師阿Ray坐，最後就調咗去一號枱，之後我個位Kama就坐咗，起初Kama見到我個名都唔敢坐，之後我示意已調位。我本身個位隔籬應該係張文慈坐，唔知點解佢助手坐咗落去之後唔起身，張文慈行嚟就望住佢！我都覺得有冇搞錯！」
袁彌明
「知道有咁嘅事，全部人都有助手，全部助手都唔會坐埋嚟，因為全部座位都有名牌，Kama原本被安排坐喺我隔籬，不過佢一嚟就亂咁坐，見到Pinky個位被坐後，個樣都好嬲，我有叫佢坐過嚟我嗰邊，不過佢唔肯，可能話晒佢都係前輩嘛。」
陳妙瑛
「其實每個位都有名牌，我都懵盛盛唔係好知發生咩事，只係同文慈影完相，見到佢個位畀人坐咗，佢就戇居居咁企咗喺度，坐咗佢個位啲人又好似好忙咁，我咪叫佢坐過嚟囉。」