徐子珊與王祖藍日前在觀塘為電影《矮仔多情》拍外景，二人在造型上均有大突破，港姐出身的子珊臉上有刀疤及左臂上有紋身，在戲中要不時飲酒猜枚，早前更因學揸電單車而不慎撞瘀了膝頭。
子珊和祖藍在戲中有發展，問到現實中她可曾被矮小男士追求過？她說：「未試過呀，不過最緊要都係人品同性格好啫。」祖藍則一身型男打扮倚在電單車旁擺甫士，但原來有型要付出代價，祖藍雙眼被煙熏得狂流眼水，而且要直踩到翌日早上六時，隨即拍陳慶嘉電影《人間喜劇》，只得三個小時睡覺。
問他頻拍喜劇可怕被定型？祖藍笑言：「咁快試晒其他嘢我就可以拎終身成就獎啦，何況今年大家都想拍開心嘢，（今次係咪好好艷福？）乜個個都focus喺呢度？不過我自己都係！我會同Race（黃婉伶）跳辣身舞，都幾期待㗎！」