泰國芭堤雅政局不穩，許志安和張衞健（Dicky）早前到當地旅行時不但忌諱穿紅衣服，連游水都要接受金屬探測器檢查，以及遭保安嚴密監視，十分誇張！而泰國華僑盧惠光則呼籲港人暫時不要到當地旅行，直言槍林彈雨博唔過。
許志安和Dicky在上周一（6日）結伴到泰國芭堤雅旅行，怎料逗留兩天便發生泰國政局動盪，據知二人入住的Dusit Thani Pattaya Hotel酒店，與國務院總理溫家寶到訪泰國時入住的屬同一間，所以保安特別嚴密。安仔昨日為佛誕歌進行錄音時說：「8號嗰日，酒店人員突然通知我哋因政局關係，會有相應保安措施實行，之後就封咗八樓全層。原本諗住可以搵溫總理影張合照，但我哋返嚟佢先到，緣慳一面。」
收到消息有衝擊
安仔原本打算到泰國享受陽光與海灘，但結果連外出游水都要「過關斬將」，他笑說：「每出泳池都要接受金屬探測器檢查，又有中南海保鏢用望遠鏡監視，都幾尷尬，平時畀女人望就話啫。（有冇再着白色泳褲？）今次着滑水褲。」由於泰國反政府派全部都穿上紅色衫，安仔為避嫌連帶去的紅色波衫都不敢穿，免出街被搜身。
Dicky接受訪問時說到泰國局勢緊張：「我哋都知有領導人入住我哋間酒店，後來收到消息話紅衫軍會有衝擊，成間酒店都緊張起嚟，出入都要經過X光機檢查，又有好多高大同配備晒武器嘅警察駐守。好彩最後都冇遇到暴動，但短期內都唔敢去。」
陳可辛唔怕政變
另外，身為泰國華僑的盧惠光原本亦計劃趁復活節假期帶兩個仔到泰國拜神，但因擔心政局混亂而擱置，他說：「我哥哥依家喺曼谷，但我都唔敢過去，嗰邊亂起嚟槍彈都唔知邊度射過嚟，博唔過。」他亦不贊成香港人現在到當地旅遊，他說：「明知咁亂，有咩事盞畀人笑戇居！」
而另一泰國華僑陳可辛就說：「我屋企人啱啱返咗嚟香港，所以冇咁快再返泰國，不過絕對唔關政變事，呢啲嘢好普通嘅啫，冇事嘅，成日都係咁。如果我唔係要留喺內地拍戲，就寧願趁呢段時間留喺泰國relax，個機場封埋，就冇人催我返嚟開工啦。」
採：音樂組 文：專案組