伊能靜早前返台出席活動引起混亂，並以廿六秒極速亮相快閃避傳媒。昨日她則輕鬆來港接受陳志雲的《志雲飯局》，並獲贈朱古力復活蛋及水晶后冠，似寓意喜歡做公主的她回復單身。
香港唔紅受訪輕鬆
甚少面對香港傳媒的伊能靜坦言：「沉默咗咁耐，既然選擇第一次開口，講嘅都係大家好關心嘅事。（點解揀香港講？）因為對呢個節目有安全感，我亦需要一個電視媒體等大家睇我親口講，我喺香港冇咁紅嘛！講笑啫，喺香港可以輕鬆啲，喺大陸台灣嘅工作係比較多。」
伊能靜謂一直都沒有不開心，且與哈林仍是朋友，並表示哈林亦知她會公開說話。她說：「我哋尋日通過電話有共識，亦從來冇講過對方嘅不是。」她又透露有時會與兒子哈利同住，但對於撫養權誰屬則不肯詳細講。她說：「佢（哈利）知父母對佢愛得好滿足就夠。」她承認結束九年婚姻有遺憾，但就避談與黃維德的關係，問到是否有第三者的問題，她則邊行邊說「多謝晒」離開。
黃維德冇介入婚姻
事後陳志雲亦有透露訪問內容：「伊能靜冇喊，佢話係和平、理智、協議下分開，哈林永遠喺佢生命中佔好重要嘅位置，難以有人取代。（係咪一生中最愛？）佢都係咁嘅意思，佢話無論生命邊個階段，哈林都係最重要。」陳志雲曾問她與黃維德的關係，以及是否有第三者介入而影響婚姻，但伊能靜全部否認。陳志雲說：「佢話冇第三者，主要係適應婚姻生活同成個家庭相處時迷失咗自己，佢仲多謝家婆對佢好好。佢又話分開唔係其中一方提出，係經一段時間有理智、有共識，佢滿懷感激哈林對佢嘅愛同關心。（哈林係咪畀六千萬台幣房產？）佢話係哈林買嘅，依然係屬於哈林。」據知伊能靜曾表示二人曾經共同努力挽救婚姻，並透露與哈林有不一樣的成長背景，是導致離婚的原因之一。
媒體關注無形壓力
訪問結束後，伊能靜由秘密通道離開，乘車往跑馬地馬會會所與朋友飯聚。雖被八、九輛採訪車追訪，但她落車時神情輕鬆，大方任影。她受訪時說：「成件事係媒體過分關注，令雙方有無形壓力，到目前為止係happy ending，我哋冇互講對方不是，互相保護係難得智慧，圈中好多藝人感情完咗就唔會有好關係。我好感激喺人生中遇到咁好嘅人，我同哈林依家嘅關係仍然係咁。」
文：影視組