方力申昨日到黃金海岸商場出席新碟《Time Files》簽唱會，吸引逾百歌迷及市民圍觀，小方在活動中與歌迷大玩遊戲及送禮物，場面熱鬧。由於新碟在金融海嘯下推出，小方坦言銷量較上一隻碟差，問到公司可有cut宣傳費？小方謂：「依家市道唔好，我唔想因為宣傳搞到公司蝕錢，寧願自己出席多啲活動宣傳！」
小方又謂最近接騷或拍廣告也不容易，因酬勞近日減少了，他表示：「因為出面好多公司都搞減價戰，搞到藝人個價變到低晒，不過我哋公司好好彩，因為有合作開嘅夥伴，大家有商有量！」問小方可有因其他人「頂爛市」而令自己失去工作？他說：「咁又唔知，公司唔會講咁多，淨係知道有啲人愈嚟愈平，只收之前十分一或十五分一價錢，我哋公司就會企硬，最多都係七折！」