官恩娜（Ella）年前慘遭狂徒索吻後，昨日出席公開場合再次惹來狂蜂浪蝶，一名態度熱情的男fans不停為她吶喊助威，又搶着上台試食她炮製的蚵仔煎，只見Ella愈退愈後兼打震，並以站在她身旁的張美妮作擋箭牌，惟事後Ella死撐說：「冇（打震），今日多人，我企開啲等觀眾睇得清楚啲啫，佢（指該fans）嚟係支持我哋個節目㗎。」
有「地獄廚神」之稱的Ella，試過入廚焗蛋糕忘記落發粉，硬到掟死狗，她說：「依家好多男仔都識得整嘢食，第二時等男友煮畀我食囉。」說到擇偶，Ella說最緊要搞笑，有冇錢冇所謂：「試過有男仔揸跑車追我，可惜唔啱我，仲要戴黑眼鏡框擋桃花呀。」
同場的王君馨則試過花八小時焗生日蛋糕給友人，前男友反而只品嘗過她煮的公仔麵而已。