苗僑偉（三哥）及張可頤日前為新劇在沙灘拍攝親吻戲，二人甚為專業，可頤於完成首次拍攝後嫌吻得不夠深度，要求重拍，三哥照咀可也，笑言：「老婆（戚美珍）喺另一部劇都同呂良偉好親密啦，使乜怕佢會呷醋！」
前晚，三哥與張可頤在西貢西沙灣沙灘拍新劇《老公萬歲》外景，該場沙灘戲講述結婚七年的二人，去露營再度蜜月，當中不乏依偎及親吻的溫馨場面。
可頤要求吻得深度
雖然二人各有另一半，拍攝時亦絲毫不尷尬，可頤拍攝完親吻戲份後更心急睇playback，更覺得吻得膚淺沒有深度，要求再拍一次，非常專業！
三哥自復出後鮮有跟女演員拍親密戲，問到今次要咀可頤可怕三嫂戚美珍呷醋？他笑言：「佢都同阿呂（呂良偉）喺新劇浪漫騎馬行沙灘啦，我咀吓怕咩啫！」
蜻蜓點水唔使準備
他又說今次的親吻戲只是蜻蜓點水式，所以不用多作準備，問到可頤的表現，三哥即大讚對方好合拍。對於有報道指他眼紅Laughing哥（謝天華）而拒拍《學警》第四輯，三哥直斥報道無聊，並說跟天華是好朋友。
另方面，早前有指可頤的緋聞男友OB曾在金融海嘯中損手，令她要復出工作，可頤否認之餘並說一向在等心水劇本。對最近影視齊開工，可會覺得辛苦？可頤說：「唔辛苦，我好享受，而且兩部嘅時間就得好，冇撞。（愈拍愈多？）唔會喇，我係貴精不貴多嘛！」
文：影視組