徐子珊前晚以透視加Bra top look現身《勁歌金曲》，雖然唱歌時略嫌不夠氣，但她的一身性感打扮，配以一連串勁歌熱舞，已足以令現場觀眾跟她一樣，喘不過氣。
子珊前晚第一次以歌手身份上《勁歌》，其一身外面透視、內裏Bra top的性感造型，即使未開聲已收先聲奪人之效，她說：「第一次上《勁歌》心情緊張，同場仲要有好多唱得嘅前輩，好似Eason（陳奕迅）頭先喺台下都有鼓勵我。（你又跳又唱唔夠氣？）我要多啲時間適應。（自評表現如何？）唔諗呢啲，監製收貨就OK，自己仲有進步空間，希望可以不斷進步。」
壓力大欠食欲
子珊又說：「我覺得做歌手壓力好大，呢輪食欲不振，瘦到着加細碼衫都好鬆，好難買衫，希望自己可以快啲適應。」而子珊昨日出席無綫兒童台活動時說：「我依家工作行先，冇可能結婚生仔，寄望家姐快啲生個仔，湊個『好』字，等媽咪開心吓。」
Eason成身塵
另外，早前出外公幹多時的Eason出席《勁歌》，他謂：「我好耐冇見過個女，可以話成身塵，因為風塵僕僕呀！雖然我出外公幹期間都有抽時間返嚟陪個女，但依家返到嚟香港都要陪多啲個女，同佢溝通多啲。（有冇留意關楚耀事件？）我希望件事快啲過，衞詩一個人喺外地好慘，同屋企人分隔兩地，相信佢亦都好難受。（知唔知陳冠希喺新加坡出席活動？）唔知。」
文：影視組