Kelvin大伯泰迪羅賓有看Kelvin公開道歉的記招，也跟Kelvin見過面，泰迪羅賓昨在電話說：「有同Kelvin傾過，佢好乖，真係知錯，希望佢記住自己喺記招嘅說話，做到所講嘅嘢，佢應承咗屋企人會努力，我覺得佢好振作。」泰迪羅賓又鼓勵Kelvin反省期間做自己最鍾意的音樂：「好好進修音樂，磨利自己把刀，將來大眾原唔原諒佢唔知，但首要係做好自己，希望大家原諒佢，畀個機會佢。」
冇經濟壓力
對關母似抗拒Kelvin女友衞詩（Jill），泰迪羅賓表示不回應，他認為做父母不會干涉Kelvin揀朋友：「佢大個仔，自己識處理，要靠自己。」
環球唱片高層黃劍濤亦與Kelvin通過電話，他說在公司立場，Kelvin事件已完結：「佢心情放低咗，瞓得好咗，佢要靜修、反省一年半載，希望大眾睇到佢衷心有誠意悔改。時間唔重要，最重要係佢有悔改心。」說到Kelvin在記招的講話，黃劍濤指是Kelvin跟公司一齊研究，律師亦有給意見。問他Kelvin可有聯絡Jill？他說：「唔知，冇問。」再問Kelvin停工會否有經濟問題？他指Kelvin不大使，亦已搬返家與父母住，更沒欠唱片公司錢，所以問題不大。
對於Kelvin宣布暫別娛圈，不少歌迷在Kelvin的Blog留言，表示震驚和可惜，並希望他反省後重返樂壇。戀情方面，歌迷勸Kelvin要明智選擇，勿讓身邊人傷心。
同時，雷頌德（Mark）前晚談到仍被扣留在日本的Jill：「佢有畀心機唱歌，大家睇到。」對Kelvin暫別樂壇，Mark認為是需要，做錯事應反省，亦戥兩人可惜。Mark續說：「衞蘭情緒OK，不過喺屋企好多時會唔開心，佢梗係擔心妹妹。」
許冠傑支持
另外，許懷欣昨出席活動時，透露父親許冠傑對Kelvin暫別娛圈的看法，懷欣說：「我識Kelvin，我覺得每個人都會犯錯，希望佢可以反省。爹哋都話支持Kelvin，話好鍾意佢嘅歌，讚佢有天分，（知唔知許冠傑有冇搵Kelvin傾呢件事？）只知爹哋同譚詠麟有聯絡，（有冇聯絡關父關維麟？）唔知。」
文：音樂組