善長贈米 獨居耆老感恩
近年百物騰貴，柴、米、油、鹽「樣樣加」，令基層長者生活愈見困難。為秉承「老吾老以及人之老」的精神，東方日報慈善基金於一九九八年起舉辦「粒粒顯關懷」贈米計劃，透過長者住屋及志願機構為長者送上白米。計劃多年來端賴各界善長支持，每分每毫的捐助皆屬彌足珍貴，不但讓一眾長者米缸繼續「常滿」，亦將關愛延續下去。
「後生嗰陣出海打魚，有咩風浪未見過？有次隻船撞山，成船五十幾人死咗廿幾個，我都係攬住支船杆一路死頂，先叫執番條命！」現年八十二歲的黎金木年輕時以捕魚維生，一直以海為家，退休後獲編配長者屋才「埋岸」定居。漁民生涯歷盡生關死劫，令木伯學懂知足，「老人家冇咩望，都係想開開心心、有啖飯食就已經心滿意足。」
木伯：清茶淡飯也可貴
不過，木伯早年與妻子離異，獨力撫養五名兒女成人已用去大部分收入，子女長大又各有家庭負擔未能供養，退休後只能靠綜援金維生，坦言人在晚年，即使一餐清茶淡飯也得來不易。猶幸自入住長者屋後，木伯即受惠於贈米計劃，得以減輕負擔，「依家咩都咁貴，有時想加餸都要諗過度過，好在東方日報慈善基金每個月都送米畀我，先叫冇咁難捱，真係好多謝啲善長！」
婆婆：經歷戰亂更覺珍惜
至於同為八十二歲的李群則曾經歷戰亂時代，憶及當年的艱苦歲月坦言仍猶有餘悸，「打仗嗰陣每日白米配得嗰幾両，仲要係得啲摻咗沙石嘅『米轆』（白米碎）！」群婆婆於戰後曾任職製衣女工，「死捱死抵」養育五名女兒成人，退休後則以綜援維生，「以前做衫有個工序叫『漿水』，啲水長時間浸過膝頭，搞到依家有風濕，綜援先得嗰幾千蚊，但打支針已經要成二百蚊，惟有喺食嗰邊慳啲，好在依家個個月有米拎，都叫冇咁擔心！」群婆婆再三感謝善長支持，坦言每次獲贈白米均感到幸福。
平田邨服務設施大樓社監黃梅珍表示，贈米計劃不但減輕長者的經濟負擔，更送上一份關愛，「呢度全部老友記都係獨居，當中大部分都拎綜援，所以佢哋每個月都好期待派米嗰一日，因為贈米令佢哋知道社會仲有好多人關心佢哋。」黃希望善長繼續支持贈米計劃，令受惠長者得到的愛與關懷永不間斷。
捐款編號︰16333
記者︰呂耀焜