獲贈雪櫃 榮叔感謝善長

曾任職保安的榮叔失業多時，一直依靠綜援金維生，生活捉襟見肘，就連家中雪櫃亦為姐夫十七年前送贈，早前突然故障亦無力重置。向來節儉的榮叔與家人非常珍惜食物，即使雪櫃失靈仍堅持以筲箕遮蓋剩餘的飯菜，可惜筲箕並無食物保鮮作用，榮叔一直擔心會孳生細菌，影響家人的健康，「丟又浪費、食又驚肚痛，到時睇醫生仲貴！」

榮叔的情況經報道後，迅即獲善長慷慨捐助，全新的雪櫃日前已送抵榮叔家中，「有時啲魚、肉好易變壞，依家有個雪櫃就唔驚，食剩嘅餸又可以留番第二日食，唔使浪費！」獲贈雪櫃後，榮叔不忘感謝善長，「好多謝《東方》同善長嘅幫忙，依家我同屋企人都唔使驚食隔夜餸食到肚痛啦！」

受惠人：李志榮

年齡：六十五歲

求助物品：雪櫃

第一手消息請下載on.cc東網iPhone/iPad/Android/Windows Phone Apps