一般打工仔都係辛辛苦苦咁為工作打拚，有啲甚至身兼幾職搵多啲錢。老實講，打兩份工其實已經係極限，但係武田玲奈呢位美人兒就充滿幹勁，實行三棲發展，而且三個工作範圍都能夠做出成績，真係好叻呀！
日本寫真女優之所以肯賣弄性感，甚至係赤身露體，都係想爭取到人氣後進軍藝能界，當佢哋達到目標之後，就會變得好錫身，想佢哋再作性感演出都幾難。不過，個人認為佢哋咁諗實在係錯晒，因為魚與熊掌根本就可以兩者兼得，就算係同時食晒三樣美食亦一樣得添，就好似武田玲奈咁喇！
今年22歲嘅武田玲奈氣質清新又精靈，個人最欣賞嘅係佢幾時都咁容光煥發，展露笑容嘅時候予人醒神又窩心嘅感覺。而最令男人醒神嘅地方，仲有纖巧而具曲線美嘅鮮嫩胴體，唔好睇玲奈瘦瘦地，其實骨肉勻稱，絕對唔會予人瘦骨嶙峋嘅感覺，加埋對D奶斤両十足，真係無比吸引！
出生於福島縣嘅玲奈，2013年參加一個叫做「尋找下一個舟山久美子」嘅選美活動，結果憑住天生麗質奪得冠軍，繼而展開模特兒之路。由於佢展現出驚人嘅潛質，往後陸陸續續為唔少時尚雜誌擔任專屬模特兒。當玲奈踏入18歲之後，就開始拍攝水着寫真賣弄健康性感，更加被喻為「史上最大級的逸材」添！
近年玲奈喺藝能界發展如意，參演過嘅電影包括有《暗殺教室》、《監獄學園》等，而明年仲有部電影《跳舞三田》上映添。另外，玲奈最近除咗忙於為日劇《美味的午餐》做宣傳，仲密密拍寫真，由於狀態Fit到漏，拍出嚟嘅寫真充滿魅力，銷量成績當然相當理想啦！玲奈撈乜都咁掂，真係令人羨慕呀！
簡介：武田玲奈工作密密麻麻，範圍又廣泛，想知道玲奈最近嘅工作動向，就要留意住佢嘅社交網喇！
網址：https://twitter.com/rena_takeda?lang=ja
年齡：22歲
身高：5呎4吋
三圍：33D-23-33
撰文：賢