根據非正式統計，裸女攝影絕大部分由男攝影師操刀，咁由女攝影師影裸女嘅效果係咪會好唔同呢？睇過女攝影師Christa Meola嘅作品後，就會發現真係非常唔同o架！就以《Fotografia Boudoir》呢本寫真為例，裸女唔係主角，性感先係！Christa Meola係一位有朵有面嘅女攝影師，佢喺網站嘅個人簡介自稱係一名「感性主義者」，畢生透過相片說故事，不論人物或事物都由鏡頭交代一切，而且佢非常欣賞女人胴體線條美，加上喜歡黑白顏色帶來嘅幻想空間，用嚟拍攝美女真係無敵呀！點無敵？正如先前講，性感先係重點，因此Christa Meola話之你係名模定師奶，為咗要突出性感一面，阿姐鍾意點影就點影，仲要黑白，一張相你唔花幾分鐘時間慢慢睇都未必知重點放喺邊，而每張作品總會令人好想一探女主角真身，咁咪引人入性囉！今次呢本寫真主題係閨房，有得睇有嘢學，鍾意玩自拍嗰班一定Like！