南韓車模之所以咁迷人，除咗因為擁有令男士心跳加速嘅迷人樣貌，同埋前凸後趷嘅火辣身材外，最重要就係識得擺甫士，令自己嘅優點更加突出。不過若然要成為一位炙手可熱嘅車模，就要好似李智宇咁識得「擺款」先至得喇！
本來擺款係指擺架子，係一個貶義詞，但套用喺李智宇身上就唔同晒，係指佢喺演出時擺出各種性感迷人嘅甫士，配合現場環境同氣氛，散發出各種唔同嘅氣質，例如喺高貴豪華嘅汽車前，佢會擺出冷艷嘅姿態；喺一架跑車前嘅話，佢又會展現出熱情奔放一面。智宇之所以咁叻擺款同懂得掌握演出，原來同佢讀書時期有關，當時佢參加話劇活動，學識點樣配合角色而散發出唔同嘅氣質，於是佢就將呢種演出技巧糅合喺車模演出上。
智宇首次參與喺釜山舉辦嘅國際車展演出時，為咗配合青春形象便以清純造型示人，因而備受注目，成功打響名堂。純情魅力固然係佢成功嘅本錢，當然亦唔少得迷人嘅樣貌同出眾身材，深深吸引男士們嘅目光。經過呢次演出之後，令佢喺車模界獲得極高人氣，跟住落嚟嘅發展亦相當順利，先後喺多個大型國際車展上亮相，更獲得汽車品牌邀請成為旗下嘅特約模特兒。為咗帶畀大家更多新鮮感，佢開始嘗試唔同嘅造型，務求每次出現都會畀到大家驚喜。
對事業好有野心嘅智宇嚟講，又點會甘於喺車模界發展呢？於是佢參加車模大賽，憑住出眾嘅外在條件及表演欲強，結果奪得最佳演出獎，成功擴闊觀眾層及提升知名度。跟住佢積極向演藝界發展，參與多個綜藝節目演出，令佢一躍成為炙手可熱兼多棲發展嘅車模。
不過成功嘅背後，所付出嘅代價並唔小，隨住工作愈嚟愈多，面對嘅工作壓力愈大，仲有因為工作排得密密麻麻，令佢冇時間休息，因而令健康愈嚟愈差，終於佢決定將工作步伐放慢落嚟，減少工作外，會抽時間做自己鍾意做嘅嘢，唔單止去旅行，仲會陪屋企人。智宇表示，雖然減少咗工作會影響人氣同收入，但係換來健康嘅身體卻係相當值得。
問到智宇從事車模工作咁多年，有冇最難忘嘅經歷？佢就話每次工作都充滿挑戰性，因此每一個工作都令佢印象深刻，同時從中可以發掘自己嘅潛能，而同相熟嘅攝影師、品牌商及車模工作，則好似見到識咗好多年嘅朋友一樣，感覺相當親切。
簡介：李智宇形象百變，但係最令人印象深刻嘅始終係初出道時嘅清純形象，實在令人百看不厭。問到智宇最滿意自己邊個身體部位時，佢就話係雙眼，皆因充滿電力，唔知大家覺唔覺得呢？如果大家想了解佢多啲，就要Click入呢個網站喇！
網址：http://cafe.daum.net/cuteeunmi
出生地：大邱
身高：172cm
三圍：35-24-35
撰文：魂