香港人生活空間細，若然喺咁細嘅空間，加多個人一齊住嘅話，嗰種壓力隨時會令人爆煲！事緣有位男網民嘅外母最近從加拿大回港探親，為咗方便照顧，外母堅持要同佢哋一齊住。佢話：「我唔明點解佢幾個仔間屋咁大都唔住，係都要住喺我哋得嗰兩百幾呎嘅單位，亦因為咁老婆踢我出梳化瞓。起初話住幾日，點知後嚟外母話想住耐啲。你知啦，屋企冇預有人嚟住，開放式睡房就梗，半夜想同老婆啪啪啪，真係唔方便！於是去酒店爆房，點知仲激氣，一上到酒店房，外母就打電話嚟問我哋返屋企未，話一個人喺屋企唔慣，結果老婆次次都心軟話要返屋企。我已經有兩個月冇同老婆行埋，大家有冇計呀？」
靚女整多件 ：睇情況應該同屋企嘅大細無關，應該係你外母唔係咁妥你。從你口中講，佢有幾個仔，點解都唔去住呢？擺明係同你有關啦！你係咪有乜嘢得罪咗佢呀？
風清場：呢個情況我都遇過，我嘅解決辦法係安排佢去嗰啲一日或兩日一夜短途旅行團，等佢出去玩吓，咁咪有時間同空間同老婆慢慢Happy囉！
蠱惑的心：睇完你單Case，我諗起有套電影，當中嘅男女主角為咗啪啪啪，就送咗個超隔音嘅耳機畀外母，等佢聽唔到任何聲音，咁你咪可以同老婆為所欲為囉！
Gal指引：你外母真係唔通氣，試問點可能會咁唔識做，阻住兩公婆嘅私人生活呢？不過換個角度睇，可能佢寂寞咗好耐想搵個女陪吓佢，你都係乖乖地接受現實啦！
撰文：魂