有人話美國嘅情慾小說總係離唔開愛情題材，但正所謂橋唔怕舊，視乎作者點樣將舊有橋段再包裝，然後變成令人睇到（興）合合嘅情慾作品。美國情慾小說家莉莎‧克萊佩不但精於此道，其代表作《春天的惡魔》更將大家覺得老土劇情，變成火辣辣嘅心跳之作。故事講述女主角潘朵拉‧雷凡諾係一位聰明又充滿活力嘅貴族女性，個性獨立嘅佢初登社交舞會時，對身邊女性個個抱住趁機搵老公嘅諗法而反感，因為佢最大嘅夢想係經營自己嘅桌上遊戲事業。舞會期間，百無聊賴嘅佢獨坐花園嘅長椅上，卻估唔到長裙居然被鈎住，呢個時候，眾女眼中嘅鑽石王老五，英俊嘅聖文森子爵迦柏咁啱經過花園，於是出手幫助解困，點知被人誤會佢同潘朵拉有私情。為免對方嘅名譽受損，迦柏只好提出結婚請求，不過兩人私下有協議，就係潘朵拉唔會為婚姻而放棄自己嘅事業，而迦柏亦坦言渴望自由生活。不過隨住相處嘅時間增加，兩顆本嚟拉唔埋嘅心卻慢慢地融合，而身體更係激烈地交纏。