日本演藝界競爭激烈，團體與團體之間為咗人氣而爭崩頭，而團體中嘅成員一樣為咗爭奪出場機會而明爭暗鬥，所以女藝人要保持人氣並且延長演藝壽命的確唔容易，亦因為咁，能夠活躍長達10年就真係要劏雞還神喇！呢個可能係我哋中國人嘅做法，日本女藝人則比較趨向推出寫真集以作紀念，最近北原里英為咗慶祝出道10周年，特別去到菲律賓宿霧取景拍寫真添！
27歲嘅北原里英喺2008年出道，曾經效力過好多大型人氣團體如AKB48、NGT48、SKE48等等，不過佢唔係因為實力差而被踢來踢去，而係因為歌精舞勁又有領導才能，所以先被安排去帶起團體人氣！除咗登台表演歌舞，阿妹亦係近年影視界嘅新寵兒，初次主演嘅驚慄電影《豊島園》將會喺明年上映。至於大家想欣賞里英嘅性感演出，則要留意紀念出道10周年嘅寫真集《妄想實寫化計畫》，今次拍攝地為宿霧，記錄低里英於當地遊歷以及與當地人交流同玩樂嘅過程，有性感一面，亦有充滿人情味嘅畫面。另外，寫真集包含咗妄想元素，所以會有好多由里英演出嘅天馬行空劇情，動作過癮亦有點走光嘅畫面，滿足大家對英里嘅忘想，所以呢本寫真集可謂元素豐富，值得欣賞。
書名：《妄想實寫化計畫》
售價：約HK$137
撰文：賢