近幾年有唔少知名嘅日本拉麵店嚟到香港開分店，不過價錢貴都只係其次，最淒涼就係大排長龍之後，入座時發覺座位好窄，到底係享受定係難受就由閣下定奪喇。其實想享受日本拉麵最好就梗係去日本啦，若然大家將會去日本旅行而又想食拉麵，咁就一定要去東京練馬區喇，因為當中一間拉麵店較早前有一位嬌俏可人嘅AV女優客串做煮麵師傅，呢位女優就係近期活躍度相當高嘅SOD專屬女優戶田真琴喇！
早前真琴妹應麵屋如月嘅邀請落場幫手，變身煮麵妹煮麵畀大家食，並同時推出期間限定嘅「真琴☆拉麵」，主要配料有慢煮雞肉、雞蛋、番茄同青瓜，雖然食過嘅顧客表示味道普通，而且分量偏少，但係可以得到隨麵附送嘅戶田真琴親筆簽名相片，仲能夠見到真琴落手落腳煮麵，係男人都收貨啦！
撰文：賢