呢期日本好興為一啲十幾年前嘅人氣動漫女角色進行模型化，呢個做法嘅好處固然係吸引到舊有粉絲入場，但係究竟有幾多人會記得呢套作品，卻又係另一個問題。不過對於日本動漫迷嚟講，呢套喺2008年11月開始連載嘅漫畫《藍海少女！》，縱然相隔10年，對佢哋嚟講仍然記憶猶新，而最新登場嘅模型更係作品中其中一位超人氣女角色二宮愛。佢之所以超人氣嘅原因，唔單止在於爽朗又陽光嘅性格，皆因呢位美少女擁有超火辣嘅魔鬼級數身材。模型化後，原型師將二宮愛嘅優點忠實呈現，激凸雙子峰、纖幼蛇腰以及渾圓美股，絕對係賞心悅目，配合埋招牌式嘅陽光笑容，難怪有粉絲稱極具療愈嘅作用。係唔係具有療愈作用就見仁見智，但可以肯定嘅係呢個模型製作相當用心，事關以半脫潛水衣造型登場嘅二宮愛，身上嗰套潛水衣極具動感，加上飄逸嘅秀髮及腳下嘅岩石，營造出啱啱上水嘅感覺，尤其係喺炎炎夏日見到呢個模型，更係令人有種去潛水嘅衝動。此外，模型嘅配件亦相當精緻，絕對係個用心之作。