男人要快樂從健康入手

遠離5大危機

男人想床上銷魂，棒棒梗係唔少得，既然棒棒咁重要，當然要悉心保護。英國有專家指出男士應避免做5件事，以免如此重要嘅部位受損，咁究竟呢5件事係乜呢？第一，鑲鋼珠。坊間有傳聞話男士喺棒棒中鑲鋼珠，可以令女伴更易有高潮，不過專家指手術風險高，更有機會造成感染及出現勃起困難問題；第二，紋身。夠膽喺兵器上紋身嘅男士，真係勇氣可嘉，但係專家卻指副作用好大，紋身墨水有機會造成皮膚損傷同感染，同時亦有機會導致兵器硬直時出現疼痛，若然真係想喺棒上紋身，起碼都要搵個經驗豐富嘅紋身師比較可靠；第三，美白療程。有啲男士會希望自己嘅棒棒睇起嚟美白一啲，因此接受美白療程，專家卻反對呢種做法，事關美白療程中可能會導致出現疤痕、炎症、感染或斑點，反而會影響棒棒嘅健康；第四，脫毛膏。男士唔應該為咗令兵器附近嘅皮膚光溜溜而使用脫毛膏，皆因咁樣會刺激到重要部位嘅皮膚，容易出現過敏反應或灼傷；第五，筆記簿型電腦。電腦底部溫度可高達攝氏31至40度，高溫環境會令精子受損，嚴重嘅話更有機會導致勃起障礙問題，為咗保障棒棒健康，最好都係將筆記簿型電腦放喺書枱上面。

免洗男士底褲

大熱天時出街，真係會熱到連底褲都濕埋，但係有啲男士好懶唔洗底褲，將佢吹乾後就繼續穿着，呢種衞生習慣梗係唔好啦，事關有調查顯示底褲着一日就有過百萬嘅細菌，加埋汗味同尿味，真係諗起都想嘔！而唔鍾意洗底褲嘅男士，今次就有福了，皆因丹麥有間公司研製出一條號稱唔使清洗嘅底褲！呢間名叫Organic Basics嘅公司採用咗「SilverTech 2.0」嘅物料，據稱呢種物料具有抗菌作用，連美國太空總署都係採用呢種物料，用嚟淨化太空人嘅用水。佢哋將呢種物料變成塗層，加喺佢哋設計嘅底褲上，就能去除內衣99.9%細菌同異味，換言之男士們唔使再日日洗底褲之餘，亦唔使擔心長期唔洗唔換底褲，而產生出令人厭惡嘅污漬同異味。現時呢條底褲喺網上進行眾籌，每條預售價約為29美元，並有多種顏色選擇，底褲眾籌目標價為3萬美元，現時已籌到超過13萬美元，睇嚟呢條底褲真係幾有吸引力。除咗男裝底褲外，仲有男裝底衫同襪。當然呢種唔使洗嘅底褲唔係男士嘅專利，皆因呢間公司現已發售免洗嘅女士胸圍同底褲。

C罩杯女最開心

男士見到車頭燈愈大就愈興奮，而女士則覺得係一種負擔。既然係咁，喺女士心目中認為邊個Cup數嘅罩杯覺得最快樂呢？英國有間專門處理同整形手術有關糾紛嘅律師事務所，早前做咗個調查，發現擁有C罩杯嘅女士對自己身材嘅滿意度最高，同時亦感到最快樂。由英國律師事務所Cosmetic Surgery Solicitors所進行嘅調查，成功訪問咗871位英國女士，喺眾多唔同大小罩杯嘅受訪女士中，有百分之三十九嘅C罩杯女士，對自己嘅胸部感到滿意同歡喜，其次則係D罩杯嘅女士，有百分之三十七表示滿意，接住係A或AA罩杯嘅女士，有百分之三十四感到滿意，最後係B同E罩杯嘅女士，分別有百分之二十七同百分之二十九覺得滿意。除咗滿意度外，唔同罩杯嘅女士亦對自己胸部大細發表意見，有百分之二十七同百分之二十五嘅E及A或AA罩杯女士認為，胸部大細影響咗佢哋嘅個性，有E罩杯受訪女士稱：「因為我嘅胸部，必須注意自己嘅衣着同行為，否則會被當成一個胸大冇腦及隨便嘅女人，我必須要比其他人更加努力，人哋先至會認同我嘅實力。」另外，有A罩杯女士稱：「如果我嘅胸部大一啲嘅話，會更加有自信。」

撰文：魂